Dr Catrin Wyn Edwards BA, MScEcon, PhD, PGCTHE

Maes arbenigedd Catrin yw mudo, lloches a noddfa, llywodraethiant aml-lefel a chenedlaetholdeb. Mae ei phrosiect ymchwil presennol yn archwilio syniadau o garcharu ('carcerality') mudol yn Ewrop, yn benodol mewn ymdrechion chwilio ac achub ym Môr y Canoldir. Mae ei hymchwil ddiweddaraf wedi'i selio ym meysydd Cymdeithaseg Wleidyddol Ryngwladol, Daearyddiaeth Wleidyddol, Cenedlaetholdeb a Mudo, Dinasyddiaeth ac Astudiaethau Ffiniau. Mae hi wedi gwneud gwaith maes ar fudo, noddfa a charcharu mudwyr yng Nghymru a ledled Ewrop a Gogledd America, ac mae wedi treulio amser fel ysgolhaig gwadd yn EURAC (Bolzano), UQAM (Montréal), Universitat Pompeu Fabra (Barcelona) ac Université de Moncton (Moncton).

Cyd-sefydlodd Catrin y Rhwydwaith Ymchwil Ymfudo Cymru (WISERD) yn 2020. Nod y rhwydwaith yw datblygu ymchwil, ac annog deialog rhwng academyddion mewn sefydliadau yng Nghymru a rhwng academyddion ac ymarferwyr. Mae Catrin wedi cyfrannu at nifer o ddadleuon polisi a thrafodaethau ar integreiddiad ieithyddol mudwyr, adefydlu, noddfa ac ail gartrefi. Yn 2018, dyfarnwyd 'Effaith Eithriadol mewn Ymchwil y Gwyddorau Cymdeithasol, y Celfyddydau a'r Dyniaethau' i Catrin (gyda Dr Elin Royles a Dr Huw Lewis).

Mae Catrin yn aelod o 'Grŵp Llywio Integreiddio Mudwyr' Llywodraeth Cymru ac ar fwrdd golygyddol cyfnodolyn Canadaidd, Minorités linguistiques et société / Linguistic Minorities and Society. Rhwng 2018 a 2024, roedd Catrin yn Ymddiriedolwr gyda Chanolfan Materion Rhyngwladol Cymru (WCIA).

Cyflwynwyd y wobr am Effaith Eithriadol mewn Ymchwil yn y Gwyddorau Cymdeithasol, y Celfyddydau a’r Dyniaethau i Dr Catrin Wyn Edwards, Dr Huw Lewis a Dr Elin Royles o'r Adran Gwleidyddiaeth Ryngwladol am eu gwaith yn bwydo i drafodaethau polisi cyfoes ar ieithoedd lleiafrifol, gan gynnwys y Gymraeg.

Ar ôl cwblhau PhD yn dwyn y teitl: ‘Cymunedau Iaith Lleiafrifol, Mewnfudo a Pholisïau Iaith mewn Addysg: Astudiaeth Gymharol Ryngwladol’ ym Prifysgol Aberystwyth yn 2013, bu’n ymchwilydd ôl-ddoethurol aml flwyddyn ym Mhrifysgol Ottawa, Ontario. Ymunodd Catrin â’r Adran Gweidyddiaeth Ryngwladol yn 2015, a hynny’n wreiddiol fel darlithydd cyfrwng-Cymraeg gyda’r Coleg Cymraeg Cenedlaethol.