Cyfleoedd allgyrsiol
Bydd digon o gyfleoedd i chi gymryd rhan mewn gweithgareddau allgyrsiol yn yr Adran Gwleidyddiaeth Ryngwladol.
O'r Gemau Argyfwng enwog a'r Cynllun Lleoliadau Seneddol i sgyrsiau ac amrywiaeth o gymdeithasau i fyfyrwyr, bydd digon o bethau i'ch cadw'n brysur yn ystod eich cyfnod yn Aberystwyth. Bydd y pethau hyn yn gyfle i ddatblygu sgiliau ychwanegol a fydd yn edrych yn dda ar eich CV hefyd.
Bob semester rydym yn cynnal digwyddiadau sy'n dod â myfyrwyr a staff ynghyd. Mae'r rhain yn cynnwys trafodaethau bord gron ar faterion cyfoes, sy’n rhoi digon o amser i Holi ac Ateb, darlithoedd academaidd a digwyddiadau cymdeithasol.
Efelychu Argyfyngau Rhyngwladol
Ni oedd yr adran gyntaf yng ngwledydd Prydain i gynnal gemau efelychu argyfwng er mwyn cysylltu'r hyn a ddysgir yn y dosbarth â chymhlethdodau gwleidyddiaeth ryngwladol y byd go iawn. Trwy gyfrwng y digwyddiadau hyn mae myfyrwyr yn gweithio mewn timau i ddatrys argyfwng gwleidyddol rhyngwladol ffug.
Mae myfyrwyr yn gweithio mewn timau a gallant gynrychioli llywodraethau, sefydliadau rhyngwladol, mudiadau cymdeithasol, neu'r cyfryngau a datblygu sgiliau meddwl strategol, negodi, gwaith tîm a chyfathrebu.
Senarios diweddar:
- Argyfwng Rwsia / gwladwriaethau Baltig
- Argyfwng niwclear Gogledd Corea
- Argyfwng ffoaduriaid Môr y Canoldir
- Gweithrediadau NATO yn Afghanistan
- Pandemig byd-eang! (yn 2018!)
- Gwleidyddiaeth amgylcheddol yn yr Arctig
Cânt eu cynnal dros ddau ddiwrnod – ac maent yn rhad ac am ddim!
Cynllun Lleoliadau Seneddol
Mae ein rhaglen interniaeth fawreddog yn rhoi cyfle i weithio gyda gwleidyddion etholedig a gweld gwleidyddiaeth seneddol ar waith.
Gall myfyrwyr yn eu hail flwyddyn wneud cais am leoliad gydag Aelod Seneddol yn San Steffan neu Aelod o’r Senedd yng Nghaerdydd am dair i bedair wythnos ar ddiwedd eu hail flwyddyn. Mae nifer y lleoliadau’n gyfyngedig, felly mae myfyrwyr yn mynychu cyfweliad ac yn cael eu dewis ar sail profi eu bod yn frwdfrydig am astudio gwleidyddiaeth neu gysylltiadau rhyngwladol, bod ganddynt sgiliau rhyngbersonol da, a’u bod yn gallu addasu i'r amgylchedd gwaith ac yn gallu gweithio'n galed ac yn ddiwyd o dan bwysau. Mae gwybodaeth am y cynllun yn cael ei ryddhau ym mis Tachwedd gyda'r dyddiad cau ar gyfer ymgeisio ym mis Chwefror.
Mae’r myfyrwyr yn cymryd rhan wirioneddol, gyda rolau gan gynnwys gwaith ymchwil, cynorthwyo gyda gwaith etholaeth, a mynychu digwyddiadau ac weithiau bod yn dyst i etholiadau. Mae cyllid adrannol ar gael i helpu gyda chostau.
Cynllun Cyfnewid Rhyngwladol
Rydym yn annog ein myfyrwyr i ehangu eu gorwelion trwy astudio dramor ar ein rhaglen gyfnewid am naill ai un semester neu am flwyddyn academaidd lawn ar rai o'n cynlluniau. Mae gennym bartneriaethau gydag ystod o Brifysgolion yng Ngogledd America, Ewrop, ac Asia a’r kMôr Tawel. Mae'r profiad yn cynnig safbwynt newydd ar eich pwnc, yn darparu profiadau diwylliannol newydd, ac yn ased mawr ar y CV.
Cymdeithasau Myfyrwyr
Yn hyn o beth hefyd, myfyrwyr sy’n cymryd yr awenau yn yr Adran. Mae rhai'n cyfrannu at y cyfnodolyn myfyrwyr Interstate - yr hynaf yng ngwledydd Prydain – trwy ysgrifennu neu olygu. Wedi'i sefydlu yn y 1960au, mae'n gyfnodolyn cyhoeddedig a dyfynadwy o waith academaidd. Mae ysgrifennu ar gyfer Interstate yn darparu arfer da i fyfyrwyr sy'n gweithio tuag at draethodau hir neu sy’n cynllunio gyrfaoedd sy'n ymwneud ag ysgrifennu, megis newyddiaduraeth neu'r gwasanaeth sifil. Mae hefyd yn edrych yn wych ar eich CV.
Mae gennym hefyd Gymdeithas Gwleidyddiaeth Ryngwladol, sy'n cynnal amrywiaeth o ddigwyddiadau academaidd. Mae gan Aberystwyth amrywiaeth helaeth o gymdeithasau myfyrwyr hefyd, ac mae staff a myfyrwyr yn cydweithio yng Ngweithgor Amrywioldeb yr adran a arweinir gan fyfyrwyr.