Llwyddiant Myfyrwyr Aberystwyth yng Ngwobrau Pinnacle Cenedlaethol

Yn ddiweddar, cyrhaeddodd dau fyfyriwr Amaethyddiaeth o Brifysgol Aberystwyth rownd derfynol genedlaethol Gwobrau Pinnacle, cystadleuaeth flynyddol sy’n dathlu rhagoriaeth mewn cynllunio busnes fferm ar draws prifysgolion y DU.

Cafodd myfyrwyr blwyddyn olaf Gweno Jarman a Ben James eu rhoi ar restr fer o geisiadau a gyflwynwyd gan adrannau amaethyddol ledled y DU. Datblygwyd eu cynlluniau busnes yn wreiddiol fel rhan o'r modiwl Cynllunio Ffermydd ac Uwch-reolaeth Fferm, sy'n herio myfyrwyr i gymhwyso eu dysgu i senarios ffermio byd go iawn.

Yn y rownd derfynol, teithiodd y ddau fyfyriwr i The Farmers Club yn Llundain i gyflwyno eu syniadau. Dechreuodd y diwrnod gyda chyfweliadau un-i-un gyda phanel o feirniaid arbenigol, a ddilynwyd gan gyflwyniad ffurfiol o flaen cynulleidfa o weithwyr amaethyddol proffesiynol, academyddion, a chyd-fyfyrwyr. Rhoddwyd deg munud i bob un a gyrhaeddodd y rownd derfynol gyflwyno eu cynllun, ac yna sesiwn Holi ac Ateb pum munud.

Roedd y panel yn cynnwys arweinwyr diwydiant o ADAS, Prifysgol Queens Belfast a The Farmers Club, a gynigiodd adborth adeiladol a mewnwelediad gwerthfawr. Roedd yn brofiad dwys ond gwerth chweil a brofodd hyder, cyfathrebu a sgiliau meddwl beirniadol y rhai a gyrhaeddodd y rownd derfynol.

Nododd Gweno “Roedd y profiad cyfan yn hynod werthfawr. Roedd yn gyfle gwych i gwrdd â phobl lwyddiannus yn y diwydiant amaethyddol ac i rwydweithio. Rwy’n ddiolchgar iawn i fy narlithydd Anthony O’Regan am ei arweiniad, ac i’r Adran Gwyddorau Bywyd am roi’r cyfle i mi gymryd rhan.”

Gyda’r nos, clywodd y gwesteion gan y prif siaradwr Claire Taylor, sylfaenydd cwmni ymgynghori Agvocacy, a roddodd sgwrs ysbrydoledig am ei gwaith yn adrodd straeon amaethyddol ledled y byd. Daeth y digwyddiad i ben gyda seremoni wobrwyo, lle dyfarnwyd yr ail safle i Ben a Gweno yn derbyn canmoliaeth uchel.

Wrth fyfyrio ar ei lwyddiant, dywedodd Ben “Rwy’n ddiolchgar am y sylfaen gref y mae cwrs Amaethyddiaeth Aberystwyth wedi’i rhoi i mi drwy gyfuno trylwyredd academaidd â chymhwysiad ymarferol a dirnadaeth o’r byd go iawn. Rwyf hefyd wedi bod yn ffodus i ddysgu gan ddarlithwyr angerddol, gwybodus hefyd, sydd nid yn unig yn addysgu ond sydd hefyd â phrofiad go iawn yn y diwydiant.”

Dysgwch fwy am ein cyrsiau Amaethyddiaeth yma.