Rhagfyr 2023

Croeso i rifyn cyntaf bwletin newydd prosiect yr Hen Goleg sy’n cynnwys y diweddaraf am ein cynlluniau uchelgeisiol i roi bywyd newydd i gartref Addysg Prifysgol yma yng Nghymru, yr Hen Goleg.

Dechrau’r gwaith adnewyddu

Ym mis Mehefin eleni, dechreuwyd ar y gwaith adnewyddu. Gwelwyd cynnydd sylweddol a daeth llawer o nodweddion gwreiddiol yr adeilad hanesyddol i’r amlwg wedi i newidiadau gafodd eu gwneud yn y 1960au gael eu tynnu lawr.

• Darllenwch fwy yma.

Siambr y Cyngor wedi i’r newidiadau gafodd eu gwneud yn y 1960au gael eu tynnu allan (chwith), a (dde) llun o sut fydd y Ganolfan Ddeialog newydd yn edrych wedi i’r gwaith gael ei gwblhau.

Mae gwaith hefyd wedi dechrau ar ailddatblygu maes parcio Eglwys Mihangel Sant a fydd yn darparu llefydd parcio ar gyfer gwesteion ystafelloedd gwesty 4* yr Hen Goleg. 

• Darllenwch fwy yma.

Apêl yr Hen Goleg

Apêl yr Hen Goleg yw un o ymgyrchoedd codi arian mwyaf llwyddiannus yn hanes Prifysgol Aberystwyth.

Mae dros £4m wedi'i godi gan ymddiriedolaethau, sefydliadau ac unigolion, ac mae rhoddion newydd yn parhau i gyrraedd. 

Ynghyd ag arian gan Gronfa Dreftadaeth y Loteri Genedlaethol, Llywodraeth Cymru a Chronfa Datblygu Rhanbarthol Ewrop, Cronfa Cymunedau'r Arfordir, Cronfa Gymunedol y Loteri Genedlaethol a Chronfa Ffyniant Bro mae'r prosiect bellach wedi denu dros £30m gan gyllidwyr.

• Darllenwch fwy am yr Apêl a chydnabod rhoddwyr yma.
• Mae prif gyllidwyr a phartneriaid y prosiect i’w gweld ar ddelwedd-lyfr yr Hen Goleg

Joy Welch, yn 1943 (chwith) ac yn 1998 (dde) pan gafodd ei hurddo’n Gymrawd Prifysgol Aberystwyth.

Anrhydeddu un o dorwyr cod Enigma

Ym mis Hydref, roedd hi’n bleser gennym gyhoeddi cyfraniad o £170,000 gan Ymddiriedolaeth Elusennol Addysgol Joy Welch er cof am un o’n graddedigion a gyfrannodd at dorri’r cod Enigma yn ystod yr Ail Ryfel Byd. Bydd yr arian yn mynd at sefydlu Ystafell Seminar Joy Welch yn yr Hen Goleg. 

• Darllenwch fwy yma.

Mosaic Voysey

Un o nodweddion amlycaf yr Hen Goleg yw'r mosaic sy'n wynebu'r castell. Darn gan yr artist o Lundain C A F Voysey yw hwn ac mae’n cynnwys delwedd y credir iddi gynrychioli’r mathemategydd, ffisegydd, peiriannydd a seryddwr o wlad Groeg, Archimedes. Un sydd wedi bod yn astudio’r gwaith yw’r artist Alison Pierse.

• Darllenwch fwy yma.

Sylw yn y cyfryngau

Cafodd gwaith ar yr Hen Goleg sylw helaeth ar sianelau teledu, radio ac arlein BBC Cymru/Wales ym mis Hydref, gyda chyfraniadau gan y prif gontractwr Andrew Scott Ltd, yr arbenigwyr toi Greenough and Sons a’r saer treftadaeth Gary Davies sy’n gweithio ar adfer ffenestri’r adeilad. Gallwch ddarllen dwy o’r eitemau arlein islaw:

• BBC Wales Online: Aberystwyth: Hotel and museum plan to rejuvenate Old College.
• BBC Cymru Fyw: Datgelu hanes wrth adnewyddu Hen Goleg Aberystwyth.

Y diweddaraf i chi

Gobeithiwn yn fawr y bydd y diweddariad hwn o ddiddordeb i chi. 

Diolch yn fawr am eich cefnogaeth,

Tîm Prosiect yr Hen Goleg