Dysgu o Bell

Mae ein cyrsiau dysgu o bell yn cynnig Datblygiad Proffesiynol Parhaus i ddysgwyr israddedig ac uwchraddedig. Maent yn amrywio o Gyrsiau Byr a chyrsiau Tystysgrif, i Ddiplomâu, Graddau, a rhaglenni gradd Meistr.

Mae pob rhaglen yn cynnwys cyfres o 'fodiwlau' ac mae pob modiwl yn werth nifer penodol o gredydau. Mae'r modiwlau wedi'u cynllunio i gynnig trosolwg neu ddealltwriaeth fanwl o'r pwnc, yn dibynnu ar lefel a nifer y credydau. Rhennir modiwl yn unedau sy'n cynnwys ymarferion ac enghreifftiau ym mhob un i'ch galluogi i feddwl, i gymhwyso ac i brofi'r hyn yr ydych yn ei wybod wrth ichi ddysgu. Bydd rhai modiwlau yn rhai craidd y mae rhaid eu cwblhau yn rhan o'r cwrs. Bydd eraill yn fodiwlau dewisol y gellir eu dethol.

Ar ddechrau eich astudiaethau dysgu o bell, bydd ein cymorth a'n harweiniad yn sicrhau eich bod yn gwybod sut i astudio'r rhaglen ac at bwy i droi am gyngor pellach. Rydym hefyd yn darparu hyfforddiant ar sut i gael mynediad at ein systemau cymorth a'n hadnoddau ar-lein a'u defnyddio, gan gynnwys ein rhaglenni sefydlu sgiliau pwrpasol.

Caiff ein cyrsiau dysgu o bell eu darparu drwy gyfuniad o ddulliau, gan gynnwys modiwlau ar-lein, canllawiau astudio, gweithgareddau ac adnoddau, ysgolion preswyl a gweithdai, tiwtorialau dros y ffôn neu drwy Teams, ymarferion myfyrio yn y gweithle, a chymorth gan diwtor personol a thiwtor academaidd. Cynllunnir y modiwlau gyda chanllawiau ar gyfer astudio'n annibynnol ac amrywiaeth o weithgareddau ac adnoddau megis darllen dan gyfarwyddyd, astudiaethau achos, cyfweliadau, cwisiau a grwpiau trafod ar y cyd, gyda chyngor a chymorth gan arbenigwr pwnc ynghylch y modiwl a'i aseiniadau.

Rydym y deall yn iawn bod angen cydbwysedd rhwng astudio a bywyd prysur, a'n nod yw cynnig cymaint o hyblygrwydd â phosib tra'n asesu'ch cynnydd ar sail targedau penodol. Mae dysgwyr o bell yn dilyn amserlen astudio a argymhellir er mwyn cwblhau'r rhaglen o fewn y cyfnodau canlynol:

• 3 i 5 mlynedd ar y cwrs israddedig
• 2* i 5 mlynedd ar ein cyrsiau uwchraddedig (*Sylwch: Rhaid cwblhau'r cyrsiau uwchraddedig P132D2, a P194D2 a ariennir gan fenthyciadau i fyfyrwyr uwchraddedig o fewn 2 flynedd)

Chi fydd yn penderfynu sut i reoli'ch amser i raddau helaeth. Cyn belled eich bod yn cwblhau'r isafswm credydau bob blwyddyn, ac unrhyw raglen astudio a argymhellir, cewch reoli'ch amser astudio eich hun, gan gynnwys pryd i gyflwyno gwaith i'w asesu. Gall eich tiwtor personol eich helpu i gynllunio'ch astudio, a gall y Tîm Rhaglen eich helpu i gofnodi'ch cynnydd.

Mae ein rhagelnni dysgu o bell wedi'u strwythuro i gynnwys rhywfaint o hyblygrwydd o fewn cyfyngiadau amser cyffredinol y rhaglen. Er enghraifft, bydd myfyrwyr ddim bob amser yn gwneud y cynnydd y byddent yn ei ddymuno ac os oes amgylchiadau penodol sy'n effeithio ar gynnydd myfyriwr, mae'n bosib gwneud cais i dynnu'n ôl o'r cwrs dros dro neu i ymestyn y cyfnod cofrestru.

Nid ydym yn rhoi terfynau amser ar gyfer aseiniadau unigol. Byddwch yn gweithio wrth eich pwysau ac yn pennu eich amserlen aseiniadau eich hun i sicrhau eich bod yn cwblhau'r cwrs erbyn diwedd eich dyddiad cofrestru. Ceir targedau cynnydd a chynlluniau astudio i'ch helpu gyda hyn.

Yn gyffredinol, bydd modiwl 20 credyd yn gofyn am 200 awr o astudio. Yn ymarferol, gall hyn amrywio o fodiwl i fodiwl am nifer o resymau, gan gynnwys faint y mae myfyriwr yn gwybod am y pwnc, a dilyniant yr astudio.

Mae pob rhaglen yn dechrau gydag ysgol astudio 3-5 diwrnod. Fel arfer, cynhelir ysgolion astudio mis Medi yn breswyl ym Mhrifysgol Aberystwyth, a chynhelir ysgolion astudio'r Gwanwyn ym mis Mawrth ar-lein. Am ragor o wybodaeth am Ysgolion Astudio, gweler yr adran Ysgolion Astudio. Ar ôl cwblhau nifer penodol o gredydau modiwl, mae'n bosibl y cynhelir ysgolion astudio ychwanegol, ac mae pob rhaglen yn cynnig ysgol draethawd hir i'r rhai sy'n symud ymlaen i gwblhau eu traethawd hir.

Ceir cyfleoedd i ymadael er mwyn derbyn Diploma neu Dystysgrif ar ein holl gyrisau uwchraddedig ac i ymadael â chyrsiau israddedig er mwyn derbyn Diploma.

Os ydych yn ariannu'r cwrs eich hun, cewch ddewis talu fesul modiwl a gellir gwneud hynny yn y siop ar-lein. Os ydych yn cael eich noddi gan gyflogwr, caiff y ffioedd eu talu'n flynyddol dros gyfnod o dair blynedd.

Ar ôl ichi gofrestru, byddwch yn gallu gweld adnoddau'r brifysgol, y rhaglen a'r modiwlau, a negeseuon e-bost trwy eich cyfrif Prifysgol Aberystwyth ar-lein.