Prosiect Dronau Maesnewydd: Mesur Glaswellt mewn Modd Symlach a Chlyfrach

Canolbwyntiodd Prosiect Dronau Maesnewydd ar ddod o hyd i ffordd fwy effeithlon o fesur glaswellt ar y fferm—gan leihau’r llwyth gwaith, arbed amser, a helpu ffermwyr i wneud penderfyniadau cyflymach am bori, a hynny ar sail gwybodaeth fwy cadarn. Wedi'i ariannu trwy Gyllid Arbrofi Cyswllt Ffermio, cynhaliodd tîm IBERS brofion i weld a allai dronau ddisodli mesuryddion porfeydd traddodiadol yn ddibynadwy, drwy ddarparu canlyniadau’n gynt, gan hel data mwy cyfoethog a manwl ar yr un pryd.

Mae'r rhan fwyaf o ffermwyr yn gwybod y drefn: cerdded y caeau gyda mesurydd porfa bob wythnos i fesur y gorchudd glaswellt. Mae'n gweithio, ond mae'n cymryd amser - sawl awr bob wythnos, yn aml - a dim ond ciplun ar yr hyn sy'n digwydd a geir.

Wrth i ddronau ddod yn rhatach a haws eu defnyddio, mae'r syniad y tu ôl i'r prosiect hwn yn syml: a all drôn hedfan dros y cae, mesur y glaswellt yn awtomatig, a helpu i wella penderfyniadau pori ar yr un pryd?

Wrth ganol hyn oll y mae’r graff gorchudd porfa (feed wedge) a ddefnyddir gan lawer o ffermwyr eisoes. Os gall dronau roi mesurau tebyg yn gyflym ac yn ddibynadwy, efallai y gallent ei gwneud yn haws rheoli pori.

^{Cymerwyd o: https://www.dairynz.co.nz/feed/fundamentals/feed-wedges/}

Cynhaliwyd y treial ar lain bori 20 hectar, gan ddefnyddio cymysgedd o dechnoleg dronau a mesuriadau traddodiadol.

Casglodd y drôn ddelweddau:

• Aml-sbectrol (yn dda am asesu iechyd planhigion)
• RGB safonol (fel camera arferol)

Ar yr un pryd, roedd y tîm yn dal i ddefnyddio:

• Darlleniadau mesurydd porfa
• Samplau glaswellt
• Dadansoddiadau’r labordy
• Darlleniadau Brix (sy'n gysylltiedig ag ansawdd y borfa)

Defnyddiwyd hyn i gyd i hyfforddi'r data dronau - yn y bôn yn eu dysgu sut i droi delweddau yn amcangyfrifon cywir o orchudd a chyflwr y gwair.

Y  darganfyddiadau 

Roedd y canlyniadau'n galonogol iawn:

• Roedd dronau yn cofnodi twf y glaswellt yn dda
  • Fe wnaethant sylwi pan oedd y glaswellt wedi’i bori i gyd
  • Fe wnaethant ddangos aildyfiant dros amser yn glir
• Daeth y canlyniadau gorau o’r camerâu aml-sbectrol
  • Yn fwy cywir ar gyfer mesur iechyd glaswellt
  • Ond roedd camerâu RGB safonol yn dal i weithio'n weddol dda
• Lluniwyd model gweithio i’r fferm
  • Gall y system nawr amcangyfrif gorchudd y glaswellt ar gyfer Maesnewydd heb fod angen gwneud mesuriadau â llaw drwy’r amser.

Hynny yw, profodd y drôn ei fod yn gallu gwneud y gwaith - ac o bosib yn arbed amser ar ben hynny.

Beth mae hyn yn ei olygu i ffermwyr?

Os yw'r dull hwn yn cael ei ddatblygu ymhellach, gallai gynhyrchu llwyfan / gwasanaeth a fyddai’n:

• lleihau'r amser a dreulir yn cerdded y caeau
• darparu gwybodaeth fanylach ar draws caeau cyfan
• gwella penderfyniadau am bori drwy ddefnyddio data gwell
• gwneud y gwaith llunio siartiau gorchudd porfa yn haws ac yn gynt

O'i gymharu â mesur ychydig o fannau mewn maes, gall dronau fesur maes cyfan ar unwaith.

Beth nesaf?

Tynnodd y prosiect sylw at ychydig o heriau hefyd:

• Mae pob fferm yn wahanol
  • Mae'r system yn gweithio'n dda ym Maesnewydd, ond mae'n debygol y bydd angen ei haddasu at yr amgylchiadau ar ffermydd eraill
• Mesur yr ansawdd yw'r cam nesaf
  • Ar hyn o bryd, canolbwyntir ar faint o laswellt sydd
  • Y nod yw rhagweld ansawdd y borfa hefyd o ddata’r dronau, a fyddai'n helpu ffermwyr ymhellach
• Ei gwneud hi'n hawdd ei ddefnyddio
  • Bydd angen canlyniadau syml ar ffermwyr - niferoedd clir neu graffiau y gallant weithredu arnynt yn gyflym

Mae'r prosiect hwn yn enghraifft dda o ble mae ffermio yn mynd i gyfeiriad lle y dylai fod llai o ddyfalu a mwy o ddata, ond mae’n bwysig cofio bod angen i hynny gyd-fynd ag offer gwell i helpu i wneud penderfyniadau â'r data hwn mewn ffordd syml a dealladwy. Nid disodli’r ffermwyr yw’r nod - dim ond rhoi gwell gwybodaeth iddynt, a hynny’n gynt.