Cymrawd celf gain
Vivian Ezugha
02 Mai 2013
Mae Vivian Ezugha, myfyrwraig yn ei hail flwyddyn yn Ysgol Gelf Prifysgol Aberystwyth, wedi ennill Cymrodoriaeth Windsor sef rhaglen datblygiad proffesiynol a phersonol o flwyddyn ar gyfer israddedigion Duon a Lleiafrifoedd Ethnig (BME) sydd wedi ymrwymo i weithio yng Nghymru.
Vivian yw'r unig ymgeisydd o Gymru sydd wedi ennill y Gymrodoriaeth eleni, a’r haf hwn bydd yn cael cyfnod chwe wythnos o brofiad gwaith gyda Llywodraeth Cymru yn ogystal â rhaglen gyflogaeth 50-wythnos ar ôl graddio.
Yn ystod y flwyddyn, fe fydd yn mynychu seminarau sy'n ymwneud â sgiliau arwain, sgiliau datblygiad personol yn ogystal â dysgu sut i adeiladu dyfodol mwy disglair i Leiafrifoedd Du ac Ethnig yng Nghymru a Lloegr.
Yn wreiddiol o Nigeria, symudodd Vivian gyda'i theulu i fyw i Birmingham pan oedd yn wyth-mlwydd-oed. Penderfynodd astudio yn Aberystwyth oherwydd hunaniaeth ddiwylliannol gref yr ardal ac am ei fod yn nes i’r môr a chefn gwlad.
Eglurodd y fyfyrwraig 22-mlwydd-oed, "Roeddwn wrth fy modd pan glywais fy mod wedi cael fy newis ar y cynllun yma oherwydd nid yn unig y bydd yn hwb i fy natblygiad personol, ond hefyd i’ng ngyrfa.
"Mae'r rhaglen yn hynod o ddwys ond werth bob eiliad gan ei bod yn eich herio, yn gwneud i chi feddwl am bethau'n wahanol ac yn gwella a datblygu eich hyder a'ch sgiliau cyflwyno."
Mae'r rhaglen arweinyddiaeth yn cynnwys seminarau preswyl dwys, rhaglen gwella bersonol, gwaith cymunedol, profiad gwaith haf cyflogedig a 50-wythnos o brofiad gwaith ar ôl graddio gyda Llywodraeth Cymru.
Mae ymchwil yn dangos nad yw unigolion o gefndiroedd BME yn mynd ymlaen i wneud y gorau o'u talent a photensial ar ôl mynychu sefydliadau addysg uwch.
Mae myfyrwyr BME yn llai tebygol o ddod o hyd i waith ar ôl cwblhau gradd, ac mae'r cyfraddau cymharol o ddiweithdra neu dangyflogaeth ymysg oedolion o'r cymunedau hyn ar gyfartaledd ddwywaith mor uchel â’r hyn a brofir gan eu cymheiriaid gwyn.
Ychwanegodd Vivian, "Rwy'n ymwybodol bod llawer iawn o waith i'w wneud â helpu pobl o gefndiroedd du a lleiafrifoedd ethnig i gyflawni eu potensial. Rwyf eisiau helpu i chwalu'r rhwystrau hynny a helpu pobl i gyflawni eu nodau a'u dyheadau.
"Rwyf hefyd yn credu mewn helpu pobl ifanc o gefndiroedd gwahanol i fagu hyder a gwybod eu bod yn gallu cyflawni eu potential beth bynnag yw eu sefyllfa gymdeithasol."
Gellir cael mwy o wybodaeth am Gymrodoriaeth Windsor ar gael yma: http://www.windsor-fellowship.org
AU14713
Rhannu