Arbenigedd Roboteg a Llogi Cyfleusterau

Mae’r gwasanaeth hwn wedi’i gynllunio ar gyfer sefydliadau sy'n datblygu roboteg, systemau awtonomaidd a thechnolegau wedi'u galluogi gan DA y mae angen eu profi a'u dilysu o dan amodau go iawn.  

Mae ein cleientiaid nodweddiadol yn cynnwys: 

• Cwmnïau amaeth-dechnoleg sy'n datblygu roboteg maes, systemau synhwyro ac a datrysiadau ffermio a yrrir gan ddata 
• Sefydliadau amddiffyn sy'n gweithio ar systemau awtonomaidd neu systemau a weithredir o bell 
• Datblygwyr roboteg a chwmnïau peirianneg 
• Datblygwyr systemau awtonomaidd a DA 
• Timau Ymchwil a Datblygu sy’n datblygu technolegau i’w gweithredu mewn amgylcheddau cymhleth yn yr awyr agored 

Mae'r gwasanaeth yn arbennig o werthfawr i sefydliadau sy'n gweithio ar gyfnod canol y broses ddatblygu (Lefel Parodrwydd Technoleg 4–7) ac sydd angen tystiolaeth gredadwy o berfformiad eu systemau cyn y gellir eu defnyddio yn y byd go iawn, eu masnacheiddio neu eu caffael.

Gall cleientiaid fanteisio ar: 

• Amgylcheddau profi roboteg awyr agored ar raddfa fawr 
• Amrywiaeth o dirweddau ac amodau gweithredu yn y byd go iawn 
• Labordai roboteg dan do a chyfleusterau gweithdy 
• Cymorth technegol a gweithredol 
• Arbenigedd academaidd mewn roboteg, DA a thechnolegau synhwyro 
• Cymorth i ddylunio arbrofion, casglu a dadansoddi data 
• Cydlynu prosiectau a chymorth logistaidd 

O logi cyfleusterau ar gyfer treialon annibynnol i raglenni profi a dilysu wedi’u rheoli’n llawn, gellir teilwra ein gwasanaeth i ddiwallu anghenion eich prosiect.

Manteisiwch ar arbenigedd a seilwaith roboteg o'r radd flaenaf mewn un lle 

Cyfunwch fynediad at amgylcheddau profi unigryw yn yr awyr agored â chyfleusterau roboteg arbenigol, arbenigedd academaidd a’r gallu i ddadansoddi data ar bob cam o’r broses. Rydym yn cynorthwyo sefydliadau i gynnal treialon mwy effeithiol, cynhyrchu tystiolaeth gredadwy a chyflymu arloesedd, gan leihau’r cymhlethdod ynghlwm wrth reoli partneriaid lluosog. Ar gyfer sefydliadau sydd â gofynion ehangach, gallwn fanteisio ar arbenigedd ar draws Prifysgol Aberystwyth mewn meysydd sy'n rhychwantu DA, technolegau synhwyro, dronau, cyfathrebu Amlder Radio (RF) a synhwyro o bell. 

Symud o brofion rheoledig i ddilysu yn y byd go iawn 

Mae defnyddio technolegau yn llwyddiannus yn y byd go iawn yn dibynnu ar ddeall sut maent yn perfformio y tu allan i amgylcheddau rheoledig mewn labordy. Mae amodau byd go iawn yn cyflwyno heriau fel y dirwedd, y tywydd, amrywiadau amgylcheddol a gweithredol, na all efelychiadau ar eu pen eu hunain eu hail-greu.  

Mae ein cyfleusterau profi roboteg yn cynorthwyo sefydliadau i wneud y pethau canlynol: 

• Adnabod problemau cyn defnyddio’r dechnoleg yn y byd go iawn - Nodi materion yn ymwneud â pherfformiad a chyfyngiadau cyn ei defnyddio yn y byd go iawn, gan leihau methiannau costus yng nghamau hwyr y broses.  
• Dangos gallu gyda data o’r byd go iawn - Cynhyrchu data perfformiad cadarn o’r byd go iawn i gefnogi buddsoddiadau, ceisiadau am gyllid, cyfleoedd caffael a gweithgareddau masnacheiddio.  
• Cyflymu cylchoedd datblygu - Profi, mireinio ac ailadrodd systemau yn gyflymach trwy gael mynediad at amgylcheddau, cyfleusterau ac arbenigedd addas mewn un lle.  
• Gwella ansawdd canlyniadau - Creu gweithgareddau profi mwy trylwyr trwy ddarparu cymorth arbenigol wrth ddylunio arbrofion, eu cynnal, a’u dehongli.  
• Gwneud penderfyniadau gwybodus wrth ddatblygu - Meithrin dealltwriaeth ddyfnach am berfformiad a dibynadwyedd systemau, fel y gellir gwneud penderfyniadau mwy gwybodus ynghylch datblygu, defnyddio a buddsoddi yn y dyfodol.  

Y canlyniad yw dilysu cyflymach, llai o risg a mwy o hyder wrth ddatblygu technolegau - o greu prototeipiau i’w rhoi ar waith yn y byd go iawn.

O logi cyfleusterau i raglenni profi a dilysu wedi'u rheoli'n llawn, gallwn deilwra ein gwasanaeth yn benodol i'ch gofynion.   

Efydd 
Mynediad at gyfleusterau ac amgylcheddau profi ar gyfer treialon annibynnol.  

Arian 
Mynediad at gyfleusterau yn ogystal â chymorth technegol i'ch helpu i gynnal arbrofion a threialon effeithiol.  

Aur 
Mynediad at gyfleusterau yn ogystal ag arbenigedd academaidd, dylunio arbrofion, cipio, dadansoddi a gwerthuso data i'ch helpu i gynhyrchu tystiolaeth gadarn a chyflymu’r broses ddatblygu.

Yn ogystal â chyfleusterau profi roboteg, mae’n bosib y bydd cleientiaid hefyd yn gallu manteisio ar arbenigedd ym meysydd: 

• Deallusrwydd Artiffisial a dysgu peirianyddol 
• Systemau awtonomaidd 
• Technolegau drôn 
• Cyfathrebu Amledd Radio (RF) a systemau diwifr 
• Datblygu ac integreiddio synwyryddion 
• Synhwyro o bell a monitro amgylcheddol 
• Cipio, prosesu a dadansoddi data 

Gellir ymgorffori'r arbenigedd hwn mewn rhaglenni profi a dilysu pwrpasol lle bo'n briodol.