Polisi E-gyflwyno ac E-adborth

1. Rhagair 

  1. Mae Prifysgol Aberystwyth (PA) yn mynnu bod pob darn o waith cwrs sy'n destun a baratowyd ar raglen prosesu geiriau yn cael ei gyflwyno’n electronig gan fyfyrwyr. Gellir cyflwyno mathau eraill o waith yn electronig hefyd (e.e. fideo, sleidiau cyflwyno ac ati).
  2. Mae PA yn mynnu bod staff yn rhoi gradd ac adborth yn electronig trwy Blackboard, yr amgylchedd dysgu rhithiol.
  3. Dylai myfyrwyr gyflwyno eu gwaith trwy Blackboard (neu Canvas ar gyfer myfyrwyr Aber Ar-lein).
  4. Mae PA yn darparu offer Turnitin a Blackboard (gan gynnwys Blackboard Assignment a SafeAssign) ar gyfer e-gyflwyno. Mae gan fyfyrwyr Aber Ar-lein fynediad i offer cyflwyno yn Canvas.
  5. Mae'n bosib y bydd gwaith a gyflwynir yn electronig yn cael ei wirio yn awtomatig gan wasanaeth paru testun megis Turnitin a SafeAssign a gall yr wybodaeth hon gael ei defnyddio fel rhan o’r marcio a’r adborth. Gall adroddiadau hefyd gael eu defnyddio mewn ymchwiliadau i Ymddygiad Academaidd Annerbyniol.
  6. Mae'r polisi hwn i'w gael ar wefan y Brifysgol a chyfeirir ato yn y Llawlyfr Ansawdd Academaidd.

2. Diffiniadau 

  1. Mae agweddau'r polisi hwn sy'n ymwneud â chyflwyno yn gymwys i bob gwaith i'w asesu sy'n destun a baratowyd ar brosesydd geiriau. Ni ddisgwylir i fyfyrwyr gyflwyno gwaith na chafodd ei baratoi ar brosesydd geiriau yn electronig os nad yw hyn yn bosibl yn dechnegol, er enghraifft:
    • Llyfrau nodiadau 
    • Paentiadau, darluniau, a cherfluniau 
    • Perfformiadau 
    • Cyfraniadau seminar 
    • Arbrofion labordy 
    • Meddalwedd arbenigol 
  2. Dylai marciau ac adborth ar gyfer gwaith nad yw’n cael ei gyflwyno’n electronig gael eu hychwanegu i golofn a grëwyd â llaw yn y Llyfr Graddau yn Blackboard (gweler 5.4)
  3. Mae hwn yn bolisi sy'n gymwys i waith a gyflwynir gan israddedigion, uwchraddedigion ar gyrsiau a ddysgir a myfyrwyr ymchwil uwchraddedig. 

3. Defnyddio eich Data 

  1. Gwasanaethau cwmwl yw Turnitin a Blackboard (a Canvas ar gyfer Aber Ar-lein). Felly mae'r cwmnïau’n dal gwybodaeth am staff a myfyrwyr.
  2. Mae'r wybodaeth yn cynnwys eich enw, cyfeiriad e-bost, y rhai a gofrestrwyd ar fodiwlau a'u swyddogaeth yng nghyswllt y modiwl. Bydd copi o waith a gyflwynwyd, sylwadau adborth a graddau hefyd yn cael eu storio.
  3. Hefyd, gallai staff PA ddefnyddio data a gynhyrchwyd o'r ddau wasanaeth yn rhan o wasanaeth Dadansoddi Dysgu PA. Gellir cael gwybodaeth am Ddadansoddi Dysgu yn https://www.aber.ac.uk/cy/infocompliance/dp/learning-analytics/

4. Cyflwyno gwaith 

  1. Tîm Gweinyddiaeth Addysg Myfyrwyr y Gyfadran sy'n gyfrifol am greu mannau cyflwyno safonol a mannau cyflwyno estyniad modiwlau Blackboard i bob e-gyflwyniad. Rhaid i'r mannau cyflwyno gynnwys gwybodaeth berthnasol i fyfyrwyr, gan gynnwys y dyddiad cau i gyflwyno'r aseiniad. Caiff mannau cyflwyno Aber Ar-lein eu creu gan swyddog Cynnwys Dysgu Aber Ar-lein.
  2. Oni bai bod rhesymau penodol i beidio â gwneud hynny, dylai'r dyddiad a'r amser cau fod rhwng dydd Llun a dydd Gwener yn ystod oriau swyddfa.
  3. Dylai adrannau sy'n gosod terfynau amser y tu allan i'r tymor sicrhau bod cymorth priodol ar gael i fyfyrwyr a allai fod â chwestiynau am eu cyflwyniad a’u haseiniad. Dylid cynnwys cyngor clir ar bwy i gysylltu â nhw os oes angen cymorth ar fyfyrwyr ar safle’r cwrs ar-lein. Mae manylion am y cymorth a gynigir gan y Gwasanaethau TG ar gael ar y dudalen we, Cysylltu â’r GTG.
  4. Dylai myfyrwyr gyflwyno'u gwaith mewn da bryd cyn yr amser a’r dyddiad cau. Ni fydd trafferthion TG yn cael eu hystyried yn 'amgylchiadau arbennig' (gweler adran 3.8 yn y Llawlyfr Ansawdd Academaidd).
  5. Dylai adrannau drefnu sesiwn ymarfer cyflwyno i fyfyrwyr y flwyddyn gyntaf cyn y dyddiad cau cyntaf. Dylai myfyrwyr fanteisio ar hyn i wneud yn sicr eu bod yn deall sut i gyflwyno ac i weld a allant gyflwyno'n iawn o'r cyfrifiadur y byddant yn ei ddefnyddio.
  6. Dylai myfyrwyr wirio bod eu gwaith wedi cael ei gyflwyno'n llwyddiannus. Dylai myfyrwyr gadw copi o'r dderbynneb cyflwyno a'i gadw'n ddiogel (mae canllawiau ar gael ar gyfer Turnitin a Blackboard). Os nad ydynt yn gallu gweld y dderbynneb, dylai myfyrwyr wirio a rhoi gwybod i'r Tîm Addysg Ddigidol a'u hadrannau ar unwaith am unrhyw broblemau. Cynghorir myfyrwyr Aber Ar-lein i gysylltu ag aberarlein@aber.ac.uk os bydd problem. Mae canllaw ar wirio cyflwyniad Canvas ar gael yn y Canllaw Canvas i Fyfyrwyr.
  7. Dylid sefydlu’r holl fannau cyflwyno i ganiatáu i fyfyrwyr gyflwyno sawl gwaith cyn y dyddiad cau. 
  8. Dylid sefydlu mannau cyflwyno ar Turnitin i ganiatáu i fyfyrwyr weld eu hadroddiad gwreiddioldeb. Mae cyfarwyddyd i fyfyrwyr ar ddehongli'r adroddiad paru testun ar gael yng nghanllawiau'r llyfrgell ar Gyfeirnodi a Llên-ladrad.
  9. Rhaid i'r mannau cyflwyno gael eu gosod i gyflwyno'n ddienw oni bai bod rheswm penodol i beidio â gwneud hynny.
  10. Os bydd cofrestriad y myfyrwyr wedi’i atal neu eu cyfrifon wedi’u cloi ni fyddant yn gallu cyflwyno eu gwaith. Bydd myfyrwyr yn y sefyllfa hon wedi derbyn negeseuon e-bost gan y brifysgol am hyn a fydd yn cynnwys manylion am sut i fynd i'r afael â'r sefyllfa. Gall myfyrwyr hefyd ddefnyddio'r dudalen we Gwiriwch fod eich cyfrif TG Prifysgol Aberystwyth yn gweithio i weld statws eu cyfrifon a darganfod â phwy i gysylltu i gael mwy o gymorth.

5.  Rhoi Gradd ac Adborth 

  1. Mae polisi PA ynglŷn ag adborth yn rhan o'r Llawlyfr Ansawdd Academaidd. Mae'r polisi yn cynnwys gwybodaeth am Egwyddorion Adborth Effeithiol PA.
  2. Dylai staff roi adborth i fyfyrwyr o fewn 15 diwrnod gwaith ar ôl y dyddiad cyflwyno. Dydd Llun i ddydd Gwener pan fydd y Brifysgol ar agor yw'r dyddiau gwaith cydnabyddedig. Mae rhagor o wybodaeth am hyn yn Llawlyfr Ansawdd Academaidd PA.
  3. Rhaid rhoi marciau ac adborth trwy Blackboard (neu Canvas ar gyfer cyrsiau Aber Ar-lein). Gall staff ddefnyddio'r offer adborth sydd wedi'u hymgorffori yn Turnitin neu Blackboard i roi gradd ac adborth.
  4. Dylid rhoi marciau ac adborth i waith na chafodd ei gyflwyno'n electronig trwy ychwanegu colofn â llaw i'r llyfr graddau yn Blackboard. Mae hyn yn cynorthwyo myfyrwyr i gadw'r adborth mewn un lle, a gweld manylion eu marciau ar draws y modiwl. Mae hefyd yn caniatáu trosglwyddo marciau o Blackboard i AStRA. Os nad yw'n bosib rhoi adborth yn electronig, bydd staff yn rhoi gwybodaeth glir i fyfyrwyr ynglŷn â sut a phryd y bydd yr adborth yn cael ei roi.
  5. Nid oes angen adborth ar gyfer marciau arholiad a ychwanegir i Blackboard (mae canllawiau ar adborth ar gyfer arholiadau ar gael yn y Llawlyfr Ansawdd Academaidd).
  6. Mae canllawiau ar gyfer defnyddio adroddiadau paru testun mewn archwiliadau i achosion o Ymddygiad Academaidd Annerbyniol i'w cael yma: UAPF adroddiad ymchwiliad (sydd ar gael yn adran 3.13 o’r Llawlyfr Ansawdd Academaidd)
  7. Gellir defnyddio adroddiadau paru testun mewn archwiliadau i achosion o Ymddygiad Academaidd Annerbyniol.

 

6.  Traethodau Hir 

  1. Dylai pob traethawd hir israddedig ac uwchraddedig trwy gwrs gael eu cyflwyno'n electronig.
  2. Bydd gofyn i fyfyrwyr ymchwil uwchraddedig gyflwyno gwaith yn electronig ar gyfer prosesu eu traethawd PhD i'w arholi.

7.  Cyfnod Cadw 

  1. Mae cyrsiau Blackboard, gan gynnwys marciau yn y llyfr graddau, yn cael eu cadw am bum mlynedd. Mae dogfennau a gyflwynir, gan gynnwys adborth, yn cael eu cadw yn Blackboard tan y bwrdd arholi nesaf o leiaf. Mae cyrsiau Aber Ar-lein gan gynnwys cyflwyniadau a marciau yn cael eu cadw am 5 mlynedd.
  2. Nod y brifysgol yw sicrhau bod dogfennau a gyflwynir ar gael i'w gweld am bum mlynedd, ond efallai na fydd hyn bob amser yn bosib oherwydd newidiadau i dechnoleg. Hysbysir staff a myfyrwyr am unrhyw newidiadau o ran gweld dogfennau a gyflwynir.
  3. Oherwydd newidiadau i dechnegol, ar hyn o bryd gellir mynd yn ôl i'r Flwyddyn Academaidd 2022-23 i weld aseiniadau Turnitin.
  4. Gall myfyrwyr weld y marciau, ac os ydynt ar gael, y dogfennau a’r adborth a gyflwynwyd, tan y bydd eu cyfrif yn cau neu tan ddaw'r cyfnod pum mlynedd i ben (p'un bynnag sy'n digwydd gyntaf).
  5. Os bydd myfyrwyr yn dymuno cadw copïau o'r gwaith a gyflwynwyd a/neu'r adborth ar ôl iddynt adael PA dylent eu lawr lwytho cyn gadael. Ni all y brifysgol warantu darparu copi o unrhyw waith a gyflwynwyd ar ôl i fyfyriwr adael.

8. Hawlfraint 

  1. Myfyrwyr sy'n cadw hawlfraint i'w gwaith gwreiddiol a gyflwynwyd i Turnitin.  Mae gwybodaeth am ddatganiad hawlfraint Turnitin i'w weld ar wefan Turnitin.
  2. Gall myfyrwyr ychwanegu eu gwaith yn wirfoddol at Gronfa Ddata Cyfeirio Byd-eang SafeAssign, ac nid yw Blackboard yn hawlio perchnogaeth ar bapurau a gyflwynwyd.
  3. Mewn rhai amgylchiadau, efallai y bydd staff yn dymuno gosod aseiniad nad yw'n ychwanegu'r cyflwyniadau i gronfa ddata ganolog Turnitin. Gellir defnyddio hyn i aseiniadau drafft neu aseiniadau sy'n cynnwys gwybodaeth bersonol.

9. Trafferthion TG 

  1. Pe byddai'r system gyfrifiadurol yn methu ar raddfa sylweddol am fwy na dwy awr rhwng 9am a 5pm ar unrhyw ddiwrnod yn yr wythnos waith, byddai dyddiadau cau cyflwyno a marcio'r diwrnod hwnnw'n cael eu hymestyn 24 awr (tan y diwrnod gwaith nesaf). Dim ond methiannau i wasanaethau y mae PA yn tanysgrifio iddynt fydd yn cael eu hystyried.
  2. Os mai Blackboard sy'n methu, bydd hyn yn effeithio ar bob dyddiad cau (Blackboard Assignments ac offer Blackboard eraill a ddefnyddir i asesu yn ogystal â Turnitin).
  3. Os mai Turnitin sy'n methu, dim ond aseiniadau Turnitin a effeithir.
  4. Bydd y Tîm Addysg Ddigidol yn monitro pob achos o'r fath. Bydd yr Arweinydd Addysg Ddigidol neu Reolwr y Gwasanaethau Llyfrgell, Academaidd a Digidol yn penderfynu pryd i weithredu'r cynllun methiant TG gan hysbysu'r Dirprwy Is-Ganghellor dros Addysg a Phrofiad Myfyrwyr, y Cyfarwyddwr Gwasanaethau Gwybodaeth Dros Dro a'r Cofrestrydd Academaidd. Yna, anfonir y penderfyniad at y Dirprwy Gofrestrydd – Gweinyddiaeth Addysg Myfyrwyr y Gyfadran, sy'n gyfrifol am gysylltu â'r holl fyfyrwyr perthnasol. Pan fo’n briodol, bydd staff Aber Ar-lein yn cael gwybod a hwy fydd yn gyfrifol am gysylltu â myfyrwyr Aber Ar-lein.
  5. Bydd methiannau eraill (megis y rhai ar systemau trydydd parti sylweddol), tarfiadau pŵer eang ac ati yn cael eu hystyried gan y Dirprwy Is-Ganghellor ar gyfer Addysg a Phrofiad y Myfyrwyr (neu Ddirprwy Is-Gangellorion Cynorthwyol Cyfadrannol ar gyfer Addysg a Phrofiad y Myfyrwyr), fesul achos. Bydd y trefniadau ar gyfer cyfathrebu a diwygiadau fel ag y nodir yn 9.4.
  6. Bydd y Tîm Addysg Ddigidol hefyd yn anfon negeseuon trwy Newyddion GG, y cyfryngau cymdeithasol a thudalen Statws GG.
  7. Pan fydd y system yn gweithio unwaith eto, bydd y Dirprwy Gofrestrydd – Gweinyddiaeth Addysg Myfyrwyr y Gyfadran yn trefnu i ddiweddaru pob man cyflwyno perthnasol gan roi'r dyddiad a'r amser cau newydd.

10.  Hygyrchedd 

  1. Mae Turnitin yn rhoi gwybodaeth am hygyrchedd eu cynnyrch ar eu gwefan. Mae gwybodaeth ynglŷn â chael mynediad i Blackboard hefyd i'w chael ar eu gwefan. Os yw staff yn cael trafferthion wrth ddefnyddio Turnitin dylent gysylltu â Phennaeth yr Adran a staff y Tîm Addysg Ddigidol.
  2. Er gwaethaf lobïo helaeth, nid oes fersiwn Gymraeg o Turnitin i'w gael. Ond, gellir defnyddio Turnitin i gyflwyno papurau yn y Gymraeg a'u gwirio am wreiddioldeb (mae pob Prifysgol yng Nghymru'n defnyddio Turnitin). Os yw staff yn dymuno rhyngwyneb Cymraeg ar gyfer cyflwyno a marcio dylent ddefnyddio offer 'Blackboard Assignment'. Mae Blackboard SafeAssign hefyd ar gael yn Gymraeg.

Cefnogaeth ac Arweiniad

Mae’r Tîm Addysg Ddigidol yn cynnig cymorth a hyfforddiant i staff ynglŷn ag e-gyflwyno. Ceir mwy o wybodaeth ar dudalennau gwe E-gyflwyno.

Staff: Gall marcio ar-lein olygu amser ychwanegol wrth gyfrifiadur ar adegau penodol o'r flwyddyn. Mae'n bwysig sicrhau bod eich gweithfan wedi'i drefnu i'ch cefnogi, mae rhagor o wybodaeth am drefnu priodol ar gael ar wefan Iechyd, Diogelwch a'r Amgylchedd. Dylai cydweithwyr gwblhau asesiad VDU a'i anfon i'w rheolwr llinell i weithredu.  Mae cymryd seibiannau o'r sgrin, er enghraifft 5 i 10 munud yr awr yn well na 20 munud bob 2 awr.

⁠Myfyrwyr: Efallai y byddwch chi'n gweithio ar eich sgrin am gyfnodau hirach wrth ysgrifennu eich aseiniadau. Mae'n arfer da sicrhau bod gennych weithfan addas wedi'i drefnu. Mae gweithio'n ddiogel gydag offer sgrin arddangos - IDA, yn ofyniad wrth fynd i mewn i weithle. Mae cymryd seibiannau o'r sgrin, er enghraifft 5 i 10 munud yr awr yn well na 20 munud bob 2 awr.

Mae'r Polisi hwn yn cael ei gynnal gan y Gwasanaethau Gwybodaeth. Fe’i adolygwyd ddiwethaf ym mis Chwefror 2026 gan y Pwyllgor Ansawdd a Safonau a bydd yn cael ei adolygu eto ym mis Chwefror 2027.