Roeddwn yn awyddus i gofrestru ar y MA Addysg, gyda ffocws ar ADY, gan mai maes o ddiddordeb personol cryf oedd hwn i mi ar ôl gweithio yn y maes hwn am nifer o flynyddoedd. Roedd yn fuddiol cael y dyddiadau cyflwyno ar gyfer yr aseiniadau yn ystod gwyliau’r ysgol gan nad oedd hyn yn golygu fy mod yn gorfod cydbwyso fy astudiaethau gyda’m swydd o ddydd i ddydd yn ormodol. Er y gall y syniad o gwblhau traethawd hir Meistr ymddangos yn frawychus, cawsom ein hannog i feddwl am faes yr oeddem yn awyddus i’w ddeall yn well. Dewisais ymchwilio i ddefnydd effeithiol o gymorth cynorthwywyr addysgu, pwnc craidd i’m rôl, a helpodd wedyn i fireinio a gwella fy ymarfer o ran dyrannu CA. Byddwn yn argymell y MA Addysg yn fawr gan ei fod yn cynnig cyfle gwerthfawr i ymgymryd ag ymchwil sy’n llywio ac yn gwella ymarfer proffesiynol yn uniongyrchol.

Bethan Payne MA Addysg (Cymru) ADY (CADY a ALl)  

Shwmae, Rob ydw i, ac fe wnes i gwblhau’r MA Addysg: Anghenion Dysgu Ychwanegol ym Mhrifysgol Aberystwyth. Dewisais y cwrs i ddyfnhau fy nealltwriaeth o ymarfer sy’n seiliedig ar ymchwil ac i gefnogi fy natblygiad proffesiynol parhaus.

Y rhan fwyaf gwerth chweil oedd dylunio a chynnal fy mhrosiect ymchwil bach fy hun, gan gyfrannu at drafodaethau ar y ffyrdd gorau o gefnogi dysgwyr ag ADY. Roedd cydbwyso astudio ochr yn ochr â gwaith a bywyd teuluol, gyda dau o blant bach, yn heriol, ond yn gwbl bosibl gyda chyfarwyddyd cyson a chefnogaeth fugeiliol fy nghynghorydd.

Mae’r rhaglen wedi cael effaith amlwg ar fy ymarfer proffesiynol, gan gryfhau fy nealltwriaeth o fethodolegau ymchwil ac yn fy ngalluogi i werthuso dulliau addysgol yn fwy beirniadol.

I unrhyw un sy’n ystyried y MA, mae’n heriol ond yn hynod werth chweil. Mae’r cyfle i gydweithio ag addysgwyr eraill a’r gefnogaeth gref gan y staff yn gwneud y daith yn un y gellir ei rheoli ac sy’n gyfoethog iawn – felly byddwn yn eich annog yn fawr i fynd amdani!

Rob Randall MA Addysg (Cymru) ADY

Cwblheais y MA Addysg Cymru ddwy flynedd yn ôl. Mwynheais yn arbennig ail-ymgysylltu ag astudiaethau academaidd, datblygu fy nealltwriaeth o’r newidiadau oedd yn digwydd gyda gweithredu’r Cwricwlwm i Gymru, a sut yr oedd hyn yn ymwneud â’m hymarfer. Helpodd y cwrs fi i gymryd cam yn ôl o fy nysgu o ddydd i ddydd ac ystyried yn feirniadol yr hyn yr oeddwn yn ei wneud yn yr ystafell ddosbarth, gan nodi beth oedd yn wirioneddol bwysig a’r pethau y gallwn eu gwella’n ymarferol. Mwynheais yn arbennig yr ymchwil ar gyfer fy nhraethawd hir – hwn oedd y ffactor a’m hysgogodd i wneud cais i astudio’r EdD. Mae cael y cyfle i gymryd rhan mewn sesiynau addysgu ar-lein a thrafod syniadau a safbwyntiau gwahanol gyda chydweithwyr ac arbenigwyr mewn ymchwil addysgol o bob cwr o’r wlad bob amser yn ysbrydoledig.

Meg McFarlane, MA Addysg (Cymru)

Mae Meg yn wreiddiol o Aberdaugleddau ac ar hyn o bryd yn Arweinydd Dysgu Ieithoedd Modern yn Ysgol Uwchradd Hwlffordd. Symudodd Meg yn ôl i Sir Benfro ddeg mlynedd yn ôl ar ôl cyfnod yn dysgu Drama ym Manceinion.

Argymhelliad gan Bennaeth Uwchradd

“Fy nod yw arwain ysgol sy’n flaengar ei meddylfryd, yn arloesol ac yn darparu cyfleoedd dysgu o ansawdd uchel i’n disgyblion, fel eu bod yn cael eu herio i feddwl yn ddwfn ac yn greadigol yn eu dysgu. Er mwyn galluogi disgyblion i wneud hyn, mae angen staff sy’n ymwybodol o ddamcaniaethau addysgol cyfredol, sy’n gallu myfyrio’n feirniadol ar ymchwil ac sy’n barod i roi cynnig ar syniadau newydd yn yr ystafell ddosbarth. Rwyf eisiau athrawon ac arweinwyr sy’n gallu cyfrannu at ddatblygiad yr ysgol ac sy’n gallu herio ein meddylfryd er mwyn sicrhau ein bod yn symud ymlaen fel ysgol mewn ffordd sy’n cefnogi ein disgyblion orau. Rwy’n gweld bod annog athrawon ac arweinwyr i ymgymryd ag ymchwil addysgol drwy raglenni’r MA a’r EdD yn meithrin y synnwyr hwn o chwilfrydedd ac yn datblygu staff sy’n gallu meddwl yn feirniadol i herio eu hunain a’r ysgol i fod y gorau y gallwn fod fel bod y disgyblion, yn y pen draw, yn gallu bod y gorau y gallant fod.”

Mae ffurflen gais cwrs MA Addysg Genedlaethol (Cymru) a'r gwahanol lwybrau wedi’u rhestru yma:

2026-27 National MA Supplementary Application Form Cymraeg - WORD

Ffurflen Gais Cydnabod Dysgu Blaenorol

MA Addysg (Wales) - Manyleb Rhaglen (PDF)

National MA in Education Regulations

Gweler gwybodaeth ynglŷn â Chydnabod Dysgu Blaenorol isod.

Mae'n nodi'r broses o gydnabod dysgu a gyflawnwyd gan unigolion cyn cael eu derbyn ar y cwrs MA. Mae'n rhoi prifysgolion mewn sefyllfa i wneud eithriadau ar gyfer modiwlau neu feysydd pwnc sydd eisoes wedi'u 'cwblhau' gan ymgeiswyr, naill ai trwy addysg ffurfiol neu trwy brofiad a datblygiad proffesiynol. Felly ni fydd gofyn i ymgeiswyr llwyddiannus ail-wneud na chwblhau dysgu y cydnabyddir eu bod eisoes wedi'i gyflawni. Yn y lle cyntaf, dylai darpar ymgeiswyr gysylltu â Chyfarwyddwr y Rhaglen i gael cyngor.

Mae’r polisi a'r ffurflen ar gyfer Cydnabod Dysgu Blaenorol i’w cael yma:

Polisi Cenedlaethol Ar Gyfer Cydnabod Dysgu Blaenorol

Ffurflen Gais Cydnabod Dysgu Blaenorol

Mae cyllid Llywodraeth Cymru ar gael i ymgeiswyr cymwys. I gael gwybodaeth am hyn ac i weld amodau/cymhwysedd meini prawf cyllid am y flwyddyn academaidd hon, cliciwch ar hyn - National MA Funding Criteria - Word

Os hoffech drafod pa mor gymwys yr ydych i gael cyllid, cysylltwch â Chyfarwyddwr y Rhaglen.

Hefyd, mae croeso i ymgeiswyr sy'n cyflawni'r gofynion mynediad wneud cais i astudio’r MA trwy dalu eu ffordd eu hunain.

Mae rhai Cwestiynau Cyffredin defnyddiol i’w gweld ar wefan cwrs MA Cenedlaethol Addysg (Cymru)