Cefnogaeth ar gyfer Effaith Ymchwil

Gall gweithgareddau effaith neu arloesi ymchwil weithiau gymryd llawer iawn o amser, ond (heblaw yn achos rhai grantiau allanol) prin eu bod wedi'u hariannu'n uniongyrchol. Gall hyn olygu fod effaith ymchwil neu arloesi yn derbyn blaenoriaeth isel o gymharu â meysydd eraill. Bydd PA yn mynd i'r afael â hyn drwy dyrannu amser yn y WAMM a chreu cofnod penodol ar gyfer gweithgareddau effaith. Mae'r WAMM wedi ei atal ar gyfer blwyddyn calendr 2023 er mwyn gwella ei ymarferoldeb. 

Mae Swyddogion Effaith Ymchwil a Chyfnewid Gwybodaeth yn darparu cyngor disgyblaeth-benodol, cymorth wrth ymgymryd â gweithgareddau ymgysylltu ac effaith a chymorth wrth ysgrifennu astudiaethau achos ar gyfer y REF.

Mae cyflwyno tystiolaeth ar gyfer effaith ymchwil yn hanfodol, yn enwedig ar gyfer yr FfRhY, ond gall weithiau fod yn broses hir sy'n cymryd llawer iawn o amser. Rydym hefyd yn cynnig cymorth arbenigol ac yn goruchwylio casglu data (e.e. ar PURE) yn ogystal ag archwilio cyfleoedd ymchwil trwy gasglu tystiolaeth effaith.

Mae PURE yn caniatáu staff i gasglu gweithgarwch ymchwil cyfredol gan gynnwys allbynnau ymchwil, gweithgareddau ac effeithiau ar un system ddiogel. Mae PURE hefyd yn bwydo data i mewn i Borth Ymchwil PA. Mae Porth Ymchwil Aberystwyth yn gwneud y gorau o ymchwil staff ac ôl-raddedigion Prifysgol Aberystwyth sydd ar gael yn agored ar-lein, yn rhad ac am ddim. Yn y porth cynhwysir allbynnau cyhoeddedig, traethodau ôl-raddedig, manylion y prosiect, yn ogystal â chofnodion o weithgareddau parch eraill. Gall pob aelod o staff academaidd ymchwil fewngofnodi i'r system gyda'u manylion mewngofnodi PA. Cysylltwch â'r Swyddog Data Mynediad Agored ac Ymchwil, pure@aber.ac.uk, os oes unrhyw broblem.

Mae'r Brifysgol yn cydnabod ei fod yn hollbwysig darparu hyfforddiant i staff ar bob agwedd o effaith ymchwil. 

Dyrannwyd cyllid i ddarparu cyfleoedd i staff academaidd gael eu hyfforddi gan arbenigwyr allanol. Ategir hyn gan hyfforddiant 'mewnol' a gynnigir gan ein Swyddogion Effaith Ymchwil a Chyfnewid Gwybodaeth a gan aelodau eraill o staff sydd eisoes wedi cael llwyddiant yn gwireddu effaith ac sy'n gallu trosglwyddo arfer gorau.

Mae'r Swyddogion Effaith Ymchwil a Chyfnewid Gwybodaeth hefyd yn derbyn hyfforddiant parhaus er mwyn gwneud yn siwr eu bod yn rhoi'r cyngor gorau. Mae'r hyfforddiant yn amrywio o sesiynau arfer gorau ar draws y sector, sesiynau ‘Hyfforddi'r Hyfforddwr’ a sesiynau dan arweiniad Senedd y DU / Llywodraeth Cymru. Mae'r hyfforddiant yma wedyn yn eu galluogi i gynnig cyflwyniadau a gweithdai effeithiol, cymorthfeydd un-i-un ac i godi ymwybyddiaeth o effaith ymchwil ledled yr Adrannau. Cysylltwch ag unrhyw anghenion hyfforddi penodol.

Mae'r Brifysgol yn annog gweithgareddau effaith ymchwil wrth wobrwyo a chydnabod llwyddiant:

Hyrwyddo effaith ymchwil ar dudalennau gwe a chyhoeddiadau eraill y Brifysgol - Bydd llwyddiant yn y maes effaith ymchwil yn cael ei hyrwyddo ar wefan y Brifysgol ac mewn deunydd cyhoeddedig a chyhoeddusrwydd.

Gwobr Prifysgol Aberystwyth am Effaith Ymchwil Rhagorol - Mae'r wobr hon yn cydnabod newid neu fudd pwysig i'r gymdeithas sydd wedi deillio o ymchwil y Brifysgol.

Mae dwy wobr ar gael; un sy'n cydnabod effaith ymchwil rhagorol yn y Gwyddorau a'r llall yn y Gwyddorau Cymdeithasol, y Celfyddydau a’r Dyniaethau. Bydd yr enillwyr yn derbyn £500 ar gyfer cefnogi gweithgareddau effaith ymchwil newydd. Gellir enwebu unigolyn neu grŵp ac mae'r wobr yn agored i holl staff academaidd y Brifysgol (beth bynnag math eu cytundeb). Gall unigolion hunan-enwebu neu gael eu henwebu gan gydweithwyr. Mae manylion y dyddiad cau fel rheol yn cael ei gyfleu drwy ebost. 

Ystyrir y ceisiadau yn nhermau cyrhaeddiad yr effaith ymchwil, a'i arwyddocâd i'r buddiolwyr. Mae'r ffurflen gais ar gael yma.