Ffeiliau Canllaw

Isafswm Presenoldeb Gofynnol Blackboard Word .

Isafswm Presenoldeb Gofynnol Blackboard PDF

• Blackboard Learn Ultra yw amgylchedd dysgu ar-lein Prifysgol Aberystwyth (PA). Mae gan bob modiwl AU ei safle cwrs ei hun ar Blackboard. Mae'r Isafswm Presenoldeb Gofynnol yn rhoi cysondeb er mwyn i fyfyrwyr allu dod o hyd i'r cynnwys y mae arnynt ei angen. Dylai'r holl gynnwys a uwchlwythir ac a gynhyrchir ar Blackboard fod mor hygyrch â phosib i sicrhau ei fod  yn gydnaws â Blackboard Ally. Gweler Cyfarwyddyd ar Greu Deunyddiau Dysgu Hygyrch PA i gael rhagor o wybodaeth. I gael cymorth wrth ddefnyddio Blackboard, gweler ein canllaw Blackboard i staff. I gael cefnogaeth wrth ddefnyddio Blackboard cysylltwch â’r Uned Datblygu Dysgu ac Addysgu (eddysgu@aber.ac.uk).

Mae pob un o safleoedd cyrsiau PA Blackboard yn defnyddio templed y cytunwyd arno ac yn cynnwys lle ar gyfer gwybodaeth graidd. Cytunir ar y templed ar gyfer modiwlau bob blwyddyn. Mae gan Gydlynwyr y Modiwlau gyfrifoldeb dros drefn y deunyddiau yn eu cyrsiau.

Ardal Gwybodaeth Modiwl

Dylai’r ardal gwybodaeth am y modiwl gynnwys y canlynol:

• Amlinelliad o'r modiwl, nodau a deilliannau dysgu. Gellir darparu llawlyfr modiwl y gellir ei lawrlwytho ar wahân sy'n cynnwys yr wybodaeth hon.
• Deunyddiau cyflwyno i helpu myfyrwyr i ymgyfarwyddo â gofynion y modiwl, wedi'u trefnu mewn un ffolder. Darparwch gyfarwyddiadau clir i fyfyrwyr ar sut i ymgymryd â'r modiwl a'r gweithgareddau dysgu.
• Gwybodaeth ynghylch pa pryd y bydd cynnwys ar gael i fyfyrwyr.
• Dolen i unrhyw wybodaeth iechyd a diogelwch berthnasol ar gyfer astudio'r modiwl, gan gynnwys asesiadau risg lle bo hynny'n berthnasol.
• Gwybodaeth am staff sy'n dysgu'r cwrs gan gynnwys manylion cyswllt ac argaeledd, sut i drefnu cyfarfod (yn bersonol neu ar-lein) a pha bryd y dylai myfyrwyr ddisgwyl cael ateb i ymholiad.
• Manylion am sut y gall myfyrwyr roi adborth ar, a gofyn cwestiynau am, y modiwl.
• Dolen i offer Cwrs Panopto
• Uwchlwytho cynllun gweithredu’r ABM

Lleoliad trefnus ar gyfer Deunyddiau Dysgu

Dylid creu strwythur ffolder neu Fodiwl Dysgu ar gyfer Deunyddiau Dysgu. Er mwyn i staff gael bod yn gyfrifol am y ffordd y trefnir y cynnwys, nid ydym wedi pennu strwythur penodol.

Dylai'r staff sicrhau:

• Bod y cynnwys wedi’i drefnu'n glir gyda ffolderi /Modiwlau Dysgu yn ôl wythnosau neu bynciau (gweler y canllawiau ar greu cynnwys i gael rhagor o wybodaeth).
• Bod yr holl gynnwys, gan gynnwys ffolderi / Modiwlau Dysgu, yn cael eu henwi'n glir ac yn gyson.
• Bod yr holl ddeunyddiau dysgu perthnasol yn cael eu huwchlwytho i safle'r cwrs ar Blackboard – mae hyn yn cynnwys sleidiau PowerPoint, taflenni, nodiadau neu ddeunyddiau ategol eraill.
• Bod y gweithgareddau dysgu'n cael eu hychwanegu ochr yn ochr â'r deunyddiau ategol perthnasol (adnoddau dysgu).
• Cyfarwyddiadau clir i fyfyrwyr ar beth i'w wneud gyda phob adnodd.
• Rhaid i'r holl ddeunyddiau dysgu fod mor hygyrch â phosib. Os na ellir gwneud rhai eitemau yn gwbl hygyrch, eglurwch pam a beth all y myfyrwyr ei wneud er mwyn gofyn am opsiynau mwy hygyrch. Gweler y Cyfarwyddyd ar Greu Deunyddiau Dysgu Hygyrch i gael mwy o wybodaeth.
• Bod dolenni i recordiadau Panopto  yn cael eu cynnwys ochr yn ochr â’r deunyddiau/gweithgareddau dysgu. Yn ychwanegol, gall staff hefyd greu dolen i’r ffolder Panopto (fel y gall myfyrwyr weld yr holl recordiadau mewn un lleoliad). I gael arweiniad ar recordio darlithoedd byw, gweler Polisi Cipio Darlithoedd PA. I gael arweiniad ar ddarlithoedd a recordiwyd ymlaen llaw, gweler Sut i sicrhau bod recordiadau anghydamserol yn ennyn brwdfrydedd ac yn rhyngweithiol  
• Pan fo'n briodol, defnyddiwch Amodau Rhyddhau i ryddhau cynnwys ar adegau penodol, i ddefnyddwyr penodol, neu yn seiliedig ar weithgareddau'r defnyddwyr.

Ardal Asesu ac Adborth

Dylai'r ffolder asesu ac adborth gynnwys:

• Gwybodaeth asesu gan gynnwys meini prawf marcio.
• Sut i gael adborth.
• Pwyntiau ar gyflwyno'r aseiniad gyda gwybodaeth lawn gan gynnwys y dyddiad a’r amser hwyraf y ceir cyflwyno’r aseiniad.
• Dolen i'r Rheoliad ar Ymddygiad Annerbyniol
• Dolen i Hen Bapurau Arholiad
• Pwy y dylid cysylltu â hwy os yw myfyrwyr yn cael trafferth yn cyflwyno aseiniadau. Cyfeiriwch y myfyrwyr at yr Uned Gwella Dysgu ac Addysgu i gael cymorth technegol (eddysgu@aber.ac.uk). 

Ardal (gudd) Arholwyr Allanol

Dylai'r ffolder hon gynnwys:

• Eitemau yr hoffech i'r Arholwr Allanol eu gweld
• Aseiniadau wedi'u marcio a lawrlwythwyd ar gyfer eu safoni
• Tystiolaeth o brosesau safoni
• Ni ddylai'r ffolder hon fyth fod yn weladwy i fyfyrwyr

Rhestr Ddarllen Aspire

Dylid ychwanegu’r rhestr ddarllen Aspire fel eitem ar wahân (yn hytrach nag mewn ffolder) a’i gosod ar y tab Cynnwys fel un o'r chwe eitem uchaf.

Mae'r Polisi hwn yn cael ei gynnal gan Gwasanaethau Gwybodaeth. Fe’i adolygwyd ddiwethaf ym mis Ionawr 2024 gan Bwyllgor Gwella Academaidd a bydd yn cael ei adolygu eto ym mis Ionawr 2025. / This Policy is maintained by Information Services, was last reviewed by Academic Enhancement Committee in January 2024 and is due for review in January 2025.